تبریزده رحمتلیک افشارلی نین یاس توره نلریندن سون خبر:

یانی دوغرودان داها سهندی گؤرمهیهجهییک می؟!

بو گون آذربایجان میلّی فعاللاری اوچون چوخ آجی و آغیر بیر گون ایدی.

اونلار بو گون افشارلی سهند کیمی بیر بؤیوک موباریز و آرخاداشی  تورپاغا تاپیشیریردیلار.

سهند وطن اوغروندا، ایللر بویو ان چالیشان ایگیت لردن بیریسی ایدی. او جوما گونو ایسفند آیینین 19وندا اردبیل- آستارا یولوندا بیر ترافیک قضاسیندا حیاتین دگیشدی. بو آجی حادیثه هامینی حئیرته دالدیرمیشدی .

آخی نئجه اولا بیلر؟ یانی دوغرودان داها سهندی  گؤرمهیهجهییک می؟!

اؤنجهدن پیلانلادیغی کیمی بو گون شنبه، ایسفند ایی نین 20 سینده،  ساعات 10:30دا، دینی تکلیفلر ادا اولوناندان سونرا، سهندین مطهر جنازهسی رحمت وادی سینده، میند ن آرتیق چالیشقان تورکون قاتیلماسی ایله مزارا طرف تشییع اولوندو. 

توپراغا تاپیشیرما مراسیمیندن سونرا حسن آغا آذربایجان(دمیرچی)، مهندیس علیریضا صرافی، مهندیس غولامریضا امانی، چنگیز بخت آو، ستار دادخواه، یاشار کرمی، حسن ارک و نوید محمدی  سهند بی افشارلی نین میللی دوشونجه سیندن و دویوشوندن آذربایجان وارلیقلاری یولوندا دانیشیقلار آپاردیلار.

مراسیمین سونوندا ایشتیراکچیلار بیرلیکده، سهندین چوخ سئودیگی آذربایجان میلّی مارشی نی اوجا  و حزین سس ایله اوخودولار.

گون اورتادان سونرا ایسه، شام غریبان تؤرنی، ایمام زمان مسجیدینده چوخ طمطراقلی کئچیریلدی و  افشارلی سهندین  یادی و آدی عزیز ساخلانیلدی.

شوبهه سیز بو چالیشقان و دیره نیشچی تورکون بوش یئری آذربایجان میللی حرکتینده هئچ زامان دولمایاجاغدیر.

ن. م... تبریز